Концепт.

Концепт.

1. – Концепт (тушунча). Тушунчанинг мазмуни; фикр, тасаввур. Лотин тилидаги conseptus “тушунча” сўзининг калькаланган шакли. Рус тилшунослигида “концепт” тушунчаси ХХ асрнинг 1-чорагида файласуф С.Асколдов томонидан илмий муомалага киритилган. Ушбу термин тилшуносликда ўтган асрнинг 80-йилларига қадар “тушунча” сўзига синоним сифатида қўлланилган бўлса, бугунги кунга келиб унинг изоҳи “тушунча” терминига нисбатан кенгайди. Концепт икки хил хусусиятга эга. Биринчидан, маданият концепт кўринишида инсоннинг ментал дунёсига кирса, иккинчидан, инсон концепт ёрдамида маданиятга киради ва баъзан унга таъсир кўрсатади. Концептнинг когнитив тилшунослик, лингвокультурология, шунингдек, адабиётшунослик фанларидаги изоҳи ўзаро фарқланади. Лингвокультурологияда концепт менталлик хусусиятига ҳамда лисоний ифодага эга бўлган, этномаданий ўзига хослиги билан ажралиб турувчи жамоа онги бирлигидир. Концепт лингвомаданий бирлик сифатида у ёки бу халқ маданиятининг ўзига хос жиҳатларини ифодалайди (Усманова, 2019:204).