Выразительные средства

ifodaviy vositalar, ifoda vositalari. Badiiy nutq tarkibida oʻz maʼnolaridan boshqa maʼno tovlanishlariga, koʻchma maʼnolarga, majoziylik xususiyatlariga ega boʻlgan soʻz va iboralar boʻlib, ular badiiy nutq taʼsirchanligini, emotsionalligini oshirishga, tarbiyaviy-estetik vazifasini konkretlashtirishga imkon beradi. Ifoda vositalari badiiy nutq tarkibida ifodalangan maqsadiga va bajargan stilistik vazifalariga koʻra, metafora (istiora), metonimiya, sinekdoxa, kinoya, allegoriya (majoz), simvol (ramz) kabi turlarga boʻlinadi. Biroq ifoda vositalarining yolgʻiz oʻzi mustaqil holda badiiylik kasb etmaydi va badiiy nutqni tashkil qilmaydi. Ular faqat badiiy tekst ichida, asar mazmuniga bogʻliq holda, boshqa tasvir vositalari bilan birgalikda maʼlum maʼno kasb etadi, muayyan badiiy vazifani bajaradi, tasvirlanayotgan voqea-hodisani va unga xos xususiyatlarni yanada boʻrttirib va umumlashtirib koʻrsatishda muhim vosita boʻladi.