Adabiyotshunoslik terminlarining izohli lugʻati
-
(гр. trilogia — уч сўз маъносидаги сўзлардан) — трилогия. Ўзининг умумий темаси, етакчи ғояси, асосий қаҳрамонлари, сюжет алоқадорлиги билан бир бутунликни ташкил этувчи уч мустақил асар. Трилогия дастлаб қадимги Афина театрида юзага келди ва кейинчалик адабиётга ўтди. Қадимги трагедияларнинг аксарияти мифологик сюжет асосида трилогия шаклида яратилган. Масалан, «Занжирбанд Прометей», «Фиванинг етти душмани», «Орестея» кабилар. Кейинчалик трилогия дунё драматургиясида ҳам кенг тарқалди. Масалан: Бомаршенинг «Севилялик сартарош», «Фигаронинг уйланиши», «Жинояткор она»; рус драматургиясида эса Островский, А. К. Толстойларнинг трилогиялари мавжуд. XIX асрга келиб автобиографик трилогиялар ҳам яратилди. Рус адабиётида Л. Н. Толстой, С. Т. Аксановларнинг трилогиялари бундай асарларга мисол бўла олади. XX аср жаҳон адабиётида эса кўпгина мураккаб ҳаётий воқеаларни бадиий ифодалашда трилогия жуда ҳам қўл келди. Масалан: Голсуорси, У. Фолкнер ва бошқа ижодкорлар замонавий мавзуларда бир қанча трилогиялар яратдилар. Совет адабиётида М. Горький ўзининг «Болалик», «Одамлар хизматида» ва «Менинг университетларим» каби уч повестдан иборат автобиографик асарлари билан совет трилогиянавислигига асос солди. А. Толстойнинг «Сарсонлик-саргардонликда» асари ҳам трилогиянинг ажойиб намунасидир. Кейинчалик Н. Погодин, Ф. Гладков, В. Беляев, О. Гончар каби ёзувчилар ҳам трилогиялар яратдилар. С. Айнийнинг «Одина», «Дохунда» ва «Қуллар» асарлари ўзбек ва тожик совет адабиётида трилогиянинг ўзига хос кўринишидир. Шунингдек, С. Аҳмад, М. Исмоилий каби ёзувчиларнинг ҳам трилогиялари бор.
Maqoladagi xato haqida xabar berish
