Синхрон таржима терминларининг изоҳли луғати
русча
-
Таржима. Таржима деганда биринчи навбатда инсоннинг ўта мураккаб нутқий-лисоний фаолияти турларидан бири тушунилади. Бундан ташқари таржима деганда ушбу жараённинг ўзи, муайян бир тилда оғзаки ёки ёзма равишда баён қилинган фикрни бошқа тил воситасида оғзаки ёки ёзма равишда қайта ифодалаш тушунилади. 2. Ўзбек тилида “таржима” сўзи ўрнига ўгириш, ағдариш, қайтариш, чевуриш каби атамалар ҳам кенг қўлланилади. “Таржима” баъзан ўгирма ҳам дейилади. Маълумки, таржима икки тилли вазиятда юзага келади. Унда икки тил иштирок этади (тиллараро вазият). Таржима бир тилдаги оғзаки ёки ёзма матннинг бошқа тилдаги оғзаки ёки ёзма матнга тиллараро қайта қуриш ёки трансформация қилиш жараёнидир. “Таржима тушунчасининг маъноси жуда кенг. Бир тилдан иккинчи тилга бадиий адабиёт: шеър, драматик ва насрий асарлар, фаннинг турли-туман соҳаларига доир илмий ва илмий-оммабоп китоблар, дипломатия ҳужжатлари, расмий қоғозлар, сиёсий арбобларнинг мақолалари ва нотиқларнинг нутқлари, газета материаллари, бошқа-бошқа тилларда сўзлашувчи, “тилмоч”нинг хизматига муҳтож бўлган кишиларнинг суҳбатлари таржима қилинади, кинофильмлар ўгирилади... Таржима тил билган ҳар қандай кимса ҳам шуғулланса бўлаверадиган юмуш эмас, балки фан ва санъатдир. Унинг ўз қонун-қоидалари мавжуд” (Ғ.Саломов). Таржимашунос В.Россельснинг фикрича: “Чет тиллар ҳозиргига қараганда ҳатто анча дурустроқ ўқитила бошланса ва бадиий асар ўзга тилда сўзловчи кишиларга худди ўз она тилидагидек тушунарли бўлган тақдирда ҳам, таржимонларга эҳтиёж асло камайди”.
Мақоладаги хато ҳақида хабар бериш
