ПАССИВНЫЕ КОНТИНЕНТАЛЬНЫЕ ОКРАИНЫ

ПАССИВНЫЕ КОНТИНЕНТАЛЬНЫЕ ОКРАИНЫ

1. Суст континентал чеккалар — океандан континентга қадимий ва замонавий ўтиш зоналарининг бир тури. С.к.ч. ёш океан ҳавзаларини (Атлантика океани тури) ўраб турувчи структуралар мажмуидан иборат. Тектоник ҳаракатлар ва вулкан жараёнлари фаоллиги бу жойларда бутунлай кузатилмайди. С.к.ч. континентларнинг бўлинишидан ва янги океан очилишидан ҳосил бўлади. Уларнинг геологик тузилиши ўзига хос бўлиб, қуйидагилардан иборат: 1) С.к.ч. зонасида океан ва континентал пўст оралиғида кескин ўтиш кузатилади; 2) океан қирғоғи бўйича кузатиладиган аномалия С.к.ч. қиёфасига параллель жойлашган; 3) С.к.ч районларида уларнинг чегараларини кесиб ўтувчи авлакогенлар ривожланган. Шунингдек, С.к.ч.га нисбатан параллель жойлашган ва яссиланиб борувчи ташлама-узулмалар системаси мавжуд; 4) шельф чегараларини кесиб ўтувчи бимодаль сериясидаги лаваларни катта майдонларга қуйилиши континентлардаги иссиқ нуқталар вулканларига геокимёвий таркиби бўйича мос келади; 5) С.к.ч. чегарасида терриген чўкиндиларнинг қалин қатлами ривожланган. Қитъа блокларини, океан туби ва атроф қисмини литостатик босим таъсирида эгилиши чўкиндилар тўпланишини тезлаштиради.