Нефт ва газ саноати изоҳли луғати
русча
-
Сув компонентларини лабораторияда аниқлаш — литосфера сувларининг кимёвий ва газ таркиби компонентларини аниқлаш. Бу мақсадда анъанавий кимёвий-аналитик таҳлил усуллари мажмуасидан тортиб кимёвий асбоблар (спектрал таҳлил, аланга фотометрияси, масс-спектрометрия ва б.) таҳлилларидан ҳам фойдаланилади. Сувларнинг ион-тузли таркиби макрокомпонентлари ҳамда эриган газ компонентларини аниқлаш усуллари дарслик ва махсус қўлланмаларда етарли даражада ёритилган. Сув таркибидаги органик моддалар ва микроэлементлар миқдори нисбатан кам бўлганлигидан уларни аниқлаш анча мураккаб кечади. Нефть-газли ҳудудлардаги сувли эритмалар одатда шўр сувлар ва намакоблардан иборат. Улардаги тузлар миқдори 10—50 дан 200—300 г/кг га етади. Сувда эриган органик моддалар компонентлари миқдори эса $10^{-2}$—$10^{-5}$мг/л атрофида. Кўпгина микроэлементлар миқдори ундан ҳам кам ($10^{-1}$—$10^{-6}$мг/л). Сувдаги микроэлементлар таҳлили усуллари ичида спектрал усул кенг қўлланилади. Унинг ёрдамида минераллашганлиги 50 мг/л бўлган қатлам сувларининг 1л ида 20 хилга яқин микроэлементларни аниқлаш мумкин. А.А.Резников ва Е.П.Муликовская, Ю.Ю.Соколовлар томонидан таклиф этилган таҳлил усуллари гидрокимёвий тадқиқотлар амалиётида кенг қўлланилмоқда. Нефть-газ ҳудудларидаги сувларнинг геокимёвий таркибини аниқ ва тўлиқ таҳлил қилиш мақсадида лаборатория базаларини қудуқлар олдига кўчириш аҳамиятлидир. Бевосита, қудуқ олдида сувларнинг Eh ва pH кўрсаткичларини аниқлаш, бир қатор экспериментал ишлар ўтказиш (мас., сувдаги микрокомпонентлар шаклини таҳлил қилиш) яхши натижалар беради. Кўчмас лаборатория базаларини кўчма лабораториялар билан ҳамкорликда ишлаши бир вақтда микроэлементлар ва эриган органик моддалар миқдорини аниқлаш имконини беради.
Мақоладаги хато ҳақида хабар бериш
