Ахборот-коммуникация технологиялари изоҳли луғати
-
ингл: frame relay рус: ретрансляция кадров Аппарат таъминоти ёрдамида маълумотларни тезкор коммутация технологияси. Кадрларни қайта узатиш технологияси Белл лабораторияси томонидан таклиф қилинган. У тез пакетлар деб аталувчи пакетларни тўғридан-тўғри коммутациясидан иборат бўлиб, ўз-ўзини аппарат билан маршрутлашни таъминлайди. Ўз навбатида бундай маршрутлаш ҳар бир коммутациясини бирлаштирувчи боғламадан ўтаётган кадрларни қабул қилиш манзиллари бўйича тақсимлашни таъминлайди. Хатоликлар пайдо бўлган кадрлар йўқ қилинади. Шу билан бирга, юқори тезликларга эришиш мақсадида, оралиқ коммутация боғламаларида маълумотларнинг инобатлилиги ва бутлиги назорат қилинмайди. Бу амал охирги коммутация боғламалари зиммасига тушади. Улар уланишларни канал бўғинида амалга оширадилар, виртуал каналлар орқали маълумотлар оқимини бошқарадилар, хатоликларни топиб тузатадилар. Қайта узатиш кам сонли хатоликлар билан ишлайдиган коммуникация тармоқларида ишлатилади. Кадрларни қайта узатиш маълумотларни ҳақиқий вақтда узатишни таъминлайди.
Мақоладаги хато ҳақида хабар бериш
