Адабиёцҳунослик терминларининг изоҳли луғати
-
болалар фольклори. Халқ ижодининг болаларга аталган ва болалар томонидан ижро этиладиган бир қисми. Болалар адабиёти (қ. Детская литература) каби, болалар фольклори ҳам ижтимоий ҳаёт талаби натижасида пайдо бўлиб, тараққий қилган. Болалар фольклори икки катта қисмга бўлинади. 1. Болалар учун мўлжалланган ва болалар томонидан айтиладиган фольклор. Бунга катталар томонидан болалар учун яратилиб, бевосита болалар томонидан айтиладиган эртаклар, қўшиқлар, тез айтиш ва топишмоқлар киради. Мантиқий жиҳатдан бу қисм болалар адабиётининг таркибий қисми ҳисобланади. 2. Болалар учун мўлжалланган ва болалар томонидан ижро этиладиган болалар ўйин фольклори. Бунга «Қора кўрдим», «Данак беркитиш», «Бекинмачоқ», «Оқ теракми, кўк терак?», «Оқ шоли — кўк шоли», «Арғимчоқ» ва копток ўйинлари киради. Биринчи қисмидаги болалар фольклори болаларда нутқни ривожлантириш, уларда одоб-ахлоқ қоидаларига риоя қилиш, инсонпарварлик, ватанпарварлик, мардлик каби хислатларни таркиб топтиришга хизмат қилса, иккинчи қисмдаги болалар фольклори уларни ижтимоий камол топтириш, болалардаги топқирлик, эпчиллик каби хислатларни ўстиришга хизмат қилади. Хуллас, болаларнинг ҳам жисмоний, ҳам маънавий камолотида болалар фольклорининг роли каттадир.
Мақоладаги хато ҳақида хабар бериш
