ЗАКЛЮЧЕНИЕ ПО ОПЕРАТИВНОЙ ИНТЕРПРЕТАЦИИ

ЗАКЛЮЧЕНИЕ ПО ОПЕРАТИВНОЙ ИНТЕРПРЕТАЦИИ

1. Тезкор талқин қилиш бўйича хулоса — каротаж диаграммаларини автоматик ишлаш ва талқин қилиш натижаси. Аниқланган параметрлар эгри чизиқ (чизма) шаклида махсус электростатик қоғозларда ифодаланади. Чизма сарлавҳасида майдоннинг номи, қудуқ рақами, бурғилаган ташкилот номи, стратиграфия, геофизик ишлар ва ЭҲМда ишлаш муддати, иш режими ва фойдаланилган системалар хили кўрсатилади. Унинг пастида жадвалда ишланган оралиқнинг усти ва пастининг чуқурлиги, қатлам суви ва бурғилаш эритмасининг солиштирма электр қаршилиги, эритманинг солиштирма оғирлиги, оралиқнинг устки температураси, нейтрон (НК) ёки акустик каротаж (АК) ва гамма каротаж (ГК) материалларини талқин қилиш учун зарур икки таянч қатламлар бўйича маълумотлар келтирилади. Ундан пастроқда чизма-тасвир кўринишида ишлаш оралиғи бўйича — биринчи устунда таянч эгри чизиқлари (ёнлама ёки индукцион каротаж ёрдамида аниқланган электр қаршилиги), ўз-ўзидан қутбланиш ПС диаграммаси, қудуқнинг диаметри ва номинал диаметри, акустик ёки нейтрон каротаж бўйича ғоваклилик ва ГК ёки ПС бўйича гиллилик коэффициенти берилади. Кейинги устунда жинсларнинг компонент таркиби (мас., оҳактош ёки қумтош матрицаси, гиллилик, ғоваклилик коэффициентлари) фоизда шартли белгилар б-н кўрсатилади. Учинчи устунда жинсларнинг коллекторлик хусусиятлари ва қатлам флюидига тўйинганлиги акс эттирилади. Шартли белгилар б-н коллекторларнинг нефть, газ ва сувга тўйинганлиги, тўйинганлиги аниқланмаганлиги, геологик жиҳатдан мураккаб ёки содда тузилганлиги ёритилади. Ундан кейинги устунда перфорация қилиб, қатламдан флюид олинадиган оралиқлар кўрсатилади. Охирги устунда қатлам флюидлари таркиби шартли белгиларда ғовакликнинг: нефть-газга, сувга тўйинган ва тўйинганлиги аниқланмаган қисмлари фоизда келтирилади. График остида шартли белгилар, ундан пастроқда коллекторларнинг қатламлар бўйича параметрлари жадвалда келтирилади. Қатламлар бўйича устки ва остки чуқурлик, қудуқ диаметри, солиштирма электр қаршилик, акустик усулдаги оралиқ вақт ($\Delta$t), гиллилик (ГК ёки ПС усуллари натижаси), ғоваклилик (АК, НК натижалари) ва нефть-газга тўйинганлик коэффициентлари, кутилаётган флюид тури акс эттирилади. Т.т.қ.б.х.га ишлаган интерпретатор (қ. Интерпретатор) қўл қўяди ва бу ҳужжатни каротаж партиясининг бош геологи тасдиқлайди. Т.т.қ.б.х. буюртмачига алоқа йўли ёки почта орқали тез етказилади.