OSTATOCHNAYA VODA — Qoldiq suv

ОСТАТОЧНАЯ ВОДА — Қолдиқ сув

1. жинс-коллекторлар нефть ва газ билан тўлганда унда қоладиган турли тоифадаги ва кўринишдаги ер ости сувлари. Бундай сувлар ўлчами жуда ҳам кичик бўлган капиллярлар ва жинс заррачаларининг ўзаро туташган юзасида капилляр кучлар билан ушланиб турилади. Н.Т.Линдроп ва В.М.Николаев (1929) фикрича, нефть ва газ қатламлари ғовакларида қ.с. кўп миқдорда йиғилса-да, нефть қудуқ томон ҳаракатланганда сув ўз жойида қолади, шу сабабли қудуқдан сувсиз нефть ва газ чиқади. Қ.с. ҳосил бўлиши нефть ва газ уюмларининг пайдо бўлиши билан узвий боғлиқ. Қатламга кириб келаётган нефть ва газ сувни ғоваклардан сиқиб чиқариши керак бўлади, лекин, сув ўз жойини бўшатмай қатламда қисман, қолдиқ сув кўринишида қолади. Гилли қумтошларда, алевролитларда, микроғовакли оҳактошларда унинг миқдори ғоваклар ҳажмининг 70% ини эгаллаши мумкин. Одатда қумли-алевролитли коллекторларда қ.с. ғоваклар ҳажмининг 10-30% ини банд этади. Углеводород уюмларидаги нефть-сув ва газ-сув туташ юзаларидаги жинсларда сувнинг капилляр кўтарилиши, газ-нефть туташ юзада эса нефтнинг кўтарилиши кузатилади. Ҳар хил таркибли тоғ жинсларидаги капилляр кўтарилишлар ҳам турлича бўлади, шу сабабли, нефть-сув, газ-сув ёки газ-нефть туташ юзаларида аниқ чегарани ажратиб бўлмайди. Бундай жойларда туташ ўтиш зоналари кузатилади. Айрим газ конларида қ.с. лардан ташқари, қолдиқ нефть ҳам бўлади. Погребенная вода, реликтовая вода, связанная вода атамаларининг синоними.