Месостих

Месостих

1. (гр. mesos — ўрта ва stichos — шеър сўзларидан) — месостих. Ҳар бир мисрадаги маълум ҳарфларни юқоридан пастга қараб ўқиганда бирор сўз ёки шахс исми ҳосил бўладиган шеър шакли. Эдгар Понинг «Топишмоқ» шеъридаги биринчи мисранинг биринчи ҳарфи, иккинчи мисранинг иккинчи ҳарфи ва шунга ўхшаш ҳарфлари қўшиб ўқилганда «Сарра Анна Льюис» исми чиқади. Бу исм мазкур шеърнинг русча таржимасида ҳам сақланган. Месостих акростих (қ.)дан фарқ қилади. Акростихда мисралардаги фақат биринчи ҳарфлардан ном ёки сўз келиб чиқади. Шарқ адабиётидаги мувашшаҳ (қ.) жанрида ҳам ном ёки яширинган сўз мисралар (ёки байтлар)нинг биринчи ҳарфидан ҳосил бўлади. Месостих асосан шаклий функция бажаргани ва яратилиши жиҳатидан бирмунча сунъий характер касб этиб, аксар ҳолларда ғоявий-эстетик жиҳатдан заифроқ бўлади.