Кобзарь

Кобзарь

1. — қўбузчи. Украин халқ қўшиқчиси. Қўбузчи халқ чолғу асбоби — қўбуз (бандура) чалиб, украин халқ тарихий қўшиқлари ва думаларини куйлаган. Ўтмишда қўбузчилар махсус касб эгаси сифатида ижтимоий ҳаётда актив иштирок этганлар. Казакларни сафарга жўнатиш ва кутиб олиш пайтида тарихий қўшиқлар, думалар айтиб, уларни ғалабаларга руҳлантирганлар. Қўбузчилик Украинада XVII—XVIII асрларда айниқса ривожланди. Уларнинг ижод намуналари А. Шута, О. Вересай каби XIX аср қўбузчиларидан ёзиб олинган. Улуғ Октябрь социалистик революциясидан кейин ҳам қўбузчилар санъати маълум вақт давом этди. Ф. Кушерник, И. Запорожченко совет даврининг машҳур қўбузчиларидир. Украин классик шоири Т. Г. Шевченко ўзининг шеърлар тўпламини «Қўбузчи» («Кобзарь») деб номлаган эди. Ўз ижодида халқнинг орзу-интилишларини куйлаганлиги, шеърларининг оптимистик руҳи ва революцион кайфиятига қараб Т. Г. Шевченко «улуғ қўбузчи» деб юритилади.