Адабиёцҳунослик терминларининг изоҳли луғати
-
— адабиётшуносликдаги биографик метод. Ёзувчи ижодини унинг ҳаётий тажрибалари ифодаси сифатида ўрганиш усули. Биографик методнинг кўзга кўринган намояндаларидан бири Сент-Бёв (1804—1869) ўзининг «Литературные портреты», («Адабий портретлар»), I—III томлар, 1844—1852), «Беседы по понедельникам» («Душанба кунларидаги суҳбатлар») (1—15- томлар, 1851—1862), «Пор-Рояль» (1—5- томлар, 1840—1859) номли асарларида ёзувчининг фақат ички дунёсигагина эмас, балки унинг уй-жой шароитига ҳам чуқурроқ киришга интилади. Унинг фикрича, ёзувчининг кундалик ҳаёти ва одатларига биринчи даражали аҳамият бериш лозим. Чунки ҳар қандай ёзувчи ҳам бошқа оддий инсонлар каби реал мавжудот бўлиб, унинг ижодида уни ўраб турган одамлар, уларнинг ҳаёти муҳим роль ўйнайди. Маиший шароит, тасодифий учрашувлар, ўзгарувчи кайфиятлар, ниҳоят, ёзувчи руҳининг хусусиятлари Сент-Бёвнинг психологик-биографик портретларида у ёки бу ёзувчи ижодидаги адабий-бадиий асарларнинг ғоявий-бадиий ўзига хосликларини ташкил этувчи омиллар сифатида таҳлил этилади. Ҳозирги пайтда чет эл адабиётшунослигидаги кўпгина монографик тадқиқотлар шу метод асосида яратилмоқда. Бироқ бирор ёзувчи ижоди ўрганилганда, ижодкор яшаган давр, ўша давр билан боғлиқ бўлган ижтимоий-сиёсий зиддиятлар, ижодкор яшаган муҳит ва шарт-шароитлардан келиб чиқиш зарур. Ана шундагина ижодкор ижоди тўғри баҳоланиши мумкин.
Мақоладаги хато ҳақида хабар бериш
